<p style="text-align: justify; "><span>केरळ, तमिळनाडू व कर्नाटक राज्यांतील एक जमात. बोलीभाषेतील फरकामुळे कुरुमन (केरळ), कुरुंबा<img class="image-inline" src="https://static.vikaspedia.in/media_vikaspedia/mr/images/social-welfare/92e93e928935935902936-93693e93894d92494d930/98.gif" style="text-align: justify; float: right; " />(तमिळनाडू), कुरुबा (कर्नाटक) या नावांनी संबोधिली जाते. १९६१च्या जनगणनेनुसार या तीन राज्यांत मिळून कुरुमन १३,५८७, कुरुंबा २,१७३ व कुरुबा ९,२४६ होते. कुरुंबा ऊर्फ कुरुमन हे जंगलवासी असून काडू कुरुंबा ही त्यांची पोटजात आहे. प्रामुख्याने कर्नाटकात आढळणारे कुरुबा मेंढपाळ असून त्यापैकी काहीजण घोंगड्या विणणारे आहेत. बेट्टा व जेनू या कुरुंबांच्या दोन पोटजाती आहेत. बेट्टा लाकूडतोडे व जेनू मध गोळा करणारे आहेत.</span></p> <p style="text-align: justify; ">या जमातीचे लोक मध्यम उंचीचे, काळ्या रंगाचे असून चेहऱ्याची ठेवण बरीचशी द्रविडांप्रमाणे असते. ह्यांना पूर्वीच्या पल्लवांचे वंशज मानले जाते. त्यांच्यात देवकपद्धती आहे.</p> <p style="text-align: justify; ">मुलामुलींची लग्ने वयात आल्यानंतरच होतात. मामे बहिणीशी लग्न करण्याची पद्धत आहे. लग्नाच्या अगोदरच देज द्यावे लागते. बायकोच्या बहिणीशी लग्न करण्याची पद्धत आहे. बहुपत्नीत्वाची चाल आहे.</p> <p style="text-align: justify; ">जमातीचे प्रमुखत्व वंशपरंपरेने चालत आलेले असते. विवाहविषयक व मृत्युविषयक विधी धर्मगुरूकडूनच केले जातात.</p> <p style="text-align: justify; ">आजाऱ्याला औषधपाणी न करता तंत्र-मंत्र, जादूटोणा, बळी देणे इ. उपाय करतात. मरणानंतर प्रेत पुरतात व त्याच्या शेजारी धान्य व पाणी ठेवतात. भूतपिशाचावर व पुनर्जन्मावर त्यांचा विश्वास आहे.</p> <p style="text-align: justify; ">संदर्भ : Luiz, A. A. D. Tribes of Kerala, New Delhi, 1962.</p> <p style="text-align: justify; "><span>लेखिका : सुमति कीर्तने</span></p> <p style="text-align: justify; ">माहिती स्रोत : <a class="external-link" href="https://marathivishwakosh.maharashtra.gov.in/khandas/khand4/index.php/khand4-suchi?id=6812" target="_blank" title="कुरुंबा">मराठी विश्वकोश</a></p>